Patay ang backrider nga manunudlo nga babayi sa nagluntad nga aksidente sa national highway sang Barangay Marina, Binalbagan, Negros Occidental, matapos magbunggu-anay ang duha ka motorsiklo sang Enero 18, 2026, alas 9:59 sang gab-i.
Ang biktima nga backrider ang ginkilala nga si Rhea, 26 anyos nga isa ka manunudlo kag residente sang Barangay 1, Hinigaran.
Ang driver amo ang iya live-in partner nga si Joshua, 26 anyos kag residente man sang nasambit nga lugar.
Samtang ang driver sang isa ka motor amo si Andre kag backrider sini nga si John.
Sa interview sang Bombo Radyo Bacolod kay Police Captain Joelan Vinson, Officer in charge sang Binalbagan Municipal Police Station, ang vehicle 1 nga ginasakyan ni Rhea ang padulong sa banwa sang Hinigaran naggikan sa Binalbagan, samtang ang vehicle 2 naman ang gikan sa Binalbagan padulong sa Hinigaran.
Suno kay Vinson, lunsay wala nagpundo ang duha ka motorsiklo samtang nagapadulong sa national highway rasun nga sila ang nagbungguanay.
Nakaagom sang pilas sa ulo ang duha ka driver, samtang pilason man ang isa ka backrider.
Gindala ang tanan nga nasamaran sa Binalbagan Infirmary apang ginbawian sang kabuhi ang backrider nga si Rhea.
Nahibaluan man nga may mga helmet ang mga sakay apang wala ini nasuksok sang tion sang aksidente.
Padayon pa ang imbestigasyon sang Binalbagan Municipal Police Station agud matumod ang matuod nga rason sang aksidente.
Ginapahanumdom sang kapulisan sa publiko nga maghalong gid sa pagmaneho, magsuksok sang helmet, gamiton ang nagakaigo nga proteksyon, kag indi gid magmaneho kon naka-inom, bangud ini ang masami nga ginahalinan sang aksidente sa dalan.
