Normal na ang sitwasyon sa ciudad sang Sagay, Negros Occidental kag nagpalauli na sa ila balay ang pila sa nag-evacuate agud nga makapaninlo sa ila puluy-an matapos ginbaha sang Sabado.
Sa interview sang Bombo Radyo Bacolod kay Sagay City Mayor Leo Rafael M. Cueva, may mga evacuees ang nagtinir pa sa evacuation center sang isa pa kaadlaw.
Suno kay Cueva ang mga apektado nga Barangay ang Barangay Fabrica, Paraiso, Barangay 1 kag 2 kag naapektuhan man ang Himogaan, Baybay.
Suno sa alkalde may isa ka casualty ang napatay matapos ang malumos.
Dugang pa sini nga ang mga evacuees ang ginhatagan sang City Government sang hot meals kag ginpasiguro man nga maayo ang kahimtangan sang mga evacuees paagi sa medical team nga nagcheck up sa ila.
Nagapadayon man ang katapo sang Disaster Risk Reduction Management Office sa pagtsekyar sang sitwasyon kag pag-assess sang kahalitan nga gintuga sang pagbahasa ciudad.
Ginpasalamatan sang alkalde ang Quick Response Team sang Sagay City kag mga kaiping nga Local Government Unit nga kaangay sang Cadiz City.
