Gindeklarar sang House Committee on Justice nga sufficient in form ang duha ka impeachment complaints nga ginpasaka batok kay President Ferdinand “Bongbong” Marcos Jr., gani mahimo na nga magpadayon sa proseso sang Kamara.
Sa una nga reklamo, 46 ka mga kongresista ang nagboto pabor sa pagdeklarar sang reklamo nga sufficient in form, isa ang nagpamatok, kag isa ang nag-abstain sa pagboto.
Samtang sa ikaduha nga reklamo, 35 ang nagboto pabor, 9 ang nagpamatok, kag isa ang nag-abstain.
Nahibaluan nga ang una nga reklamo ang ginpasaka ni Atty. Andre De Jesus, nga naga-akusar sa Presidente nga Betrayal of public trust kag paglapas sa Konstitusyon, kalakip ang issue sang ICC, alegasyon sang iligal nga droga, kag ginaalegar kapaslawan sa pag-veto sang pila ka mga probisyon sang national budget.
Ang ikaduha nga reklamo ang ginpasaka naman sang grupo sang Makabayan bloc angut sa gina-alegar ma-anomaliya sa mga proyekto sa imprastraktura.
Samtang, ginpahayag ni House Committee on Justice Chairman kag Batangas Rep. Gerville Luistro nga nagasugod pa lang ang proseso para sa sini nga mga reklamo.
Ginpanindugan naman ni Palace Press officer Usec. Claire castro nga ginarespeto nila ang impeachment proceedings kag nagapabilin nga kumpiyansa ang Presidente nga wala ini sang nahimo nga impeachable offence.
