Patay ang isa ka lalaki nga gina-alegar nakakaon sang snake turtle sa Sitio Can-amo, Brgy 6 Poblacion, Moises Padilla, Negros Occidental.
Sa interview sang Bombo Radyo Bacolod kay Moises Padilla Municipal Disaster Risk Reduction and Management Office Head Reynald Horegue, nabatun nila ang tawag nga may kinahanglan irescue alas-4:00 kahapon sang hapon.
Ang 47 anyos nga biktima ang ginapahayag nagpin-ot ang dughan kag may kabudlayan sa pagginhawa.
Ini ang ginhatagan man nila sang supplemental oxygen samtang ginabyahe padulong sa Municipal Health Infirmary.
Pagdangat sa pasilidad, gin-CPR pa ang biktima agud marevive apang ini ang wala gid makasalbar.
Samtang ginabyahe, ginatinguhaan nila nga mapabilin nga bugtaw ang pasyente, kag siya ang nakatuad nga snake turtle ang sud-an sini sa pamahaw.
Ginpahayag sang pamilya nga nagpangani pa ang biktima, apang nagpauli antes mag-utdo bangod sa paglain sang iya pamatyag.
Apisar nga ginakonsiderar sang iban nga peste ang snake turtle, ginpahanumdom nga ini ang indi pwede dakpon, sakiton ukon kaunon.
Ini kasunod sang nareport nga pagkapatay sang isa ka 47 anyos nga lalaki, nga gina-alegar napatay bangod sa pagkaon sang snake turtle.
Sa interview sang Bombo Radyo Bacolod kay Engr. Joan Nathaniel Gerangaya, Assistant Regional Director for Technical Services sang Department of Environment and Natural Resources – Negros Island Region (DENR-NIR), ang snake turtle ang masami ginahimo nga pet sang iban apang ginabutang lamang sa aquarium bangod ini ang mapintas kag makapilas kun mangagat.
Ang snake turtle ang carnivorous, gani ini ang ginakonsiderar sang iban nga peste bangod ginakaon sini ang mga isda sa fishpond kag mga talamnan.
Aminado si Gerangaya nga may mga pumuluyo sa rural area nga nagakaon ukon ginahimo sumsuman ang snake turtle.
Paathag sini nga edible ang snake turtle, apang ini ang makahilo man kun ini ang makakaon sang poisonous substance nga nagatinir sa iya panit.
Apang pahanumdom sini nga apisar invasive species, ini ang protektado sa idalom sang Wildlife Act of the Philippines.
Ang magdakop, manakit kag magkaon sini ang mahimo mapriso.
