Nagpangayo sang bulig kag kooperasyon ang Department of Social Welfare and Development – Negros Island Region sa mga Local Government Units sa rehiyon sa pagdistribute sang cash assistance sa mga nagub-an sang balay bangod sa bagyo TINO.
Suno kay DSWD NIR Director Erwin Razo, kalabanan sa nahalitan sang bagyo Tino amo ang LGUs sa 4th kag 5th district sang Negros Occidental kag may yara man sa LGUs sa Negros Oriental.
May natalana nga P1.1 billiion nga ipanagtag kag santo sa rekord, 18,339 tanan ang makabaton sang P10,325 para sa may totally damage nga balay samtang 180,145 naman ang makabaton sang P5,369 para sa may partially damage nga balay.
Kahapon, nagpatigayon sang pay-out sa apat ka Barangay sa banwa sang Hinigaran kag didto nila gin-assess ang sistema sa pagpanagtag agud maimplementar sa sunod nga pay out sa mga LGUs.
Madumduman nga may una na nga nahatagan sang financial assistance kaangay sang banwa sang Moises Padilla kag La Castellana sang tinalikdan nga tuig, apang nadelay lang ang pagpanagtag sa iban nga LGUs bangod tuman kadamo sang apektado sang bagyo TINO magluwas sa rehiyon.
Gin-athag naman ni Razo nga ang nakabaton na sadto sang ayuda sa first kag second tranche ang indi na sa liwat makabaton.
Nagapangayo ini sa karun sang bulig sa mga LGUs sa sistema sang pay out bangod tuman kadako sang kwarta ang ipanagtag kag tuman kadamo sang pagahatagan.
