Patay ang 49 anyos nga tricycle driver matapos ginluthang sang pila ka beses sa Purok Laroca, Brgy. Sta. Rosa, Murcia, Negros Occidental kaina alas-7:20 sang aga.
Ang biktima ang ginkilala nga si Roger Bayotas nga residente sang Prk. Relocation, Brgy. Sta. Rosa, Murcia.
Sa interview sang Bombo Radyo sa pakaisa ni Bayotas, nagdul-ong sang pasahero ang iya pakaisa sa isa ka buluthuan kag pabalik na ini kuntani sa ila balay para sugaton ang iya mga bata para idul-ong sa eskwelahan.
Suno diri, samtang nagabyahe may motorsiklo nga may angkas nga duha ka lalaki ang nagasunod sa iya pakaisa.
Hinali lang ginluthang sang suspek si Bayotas kag ini nadulaan sang kontrol sang iya tricycle.
Sang nag-untat ang tricycle, ginpalapitan sang suspek si Bayotas kag liwat nga ginluthang sang pila ka beses.
Suno pa diri, may tabon ang nawong sang isa ka suspek samtang ang isa naman wala sang tabon apang indi sini maklarohan ang nawong sang suspek bangod may kalayoon ang lokasyon sini kun diin nagluntad ang insidente.
