Patigayonon bwas nga adlaw ang send off ceremony para sa masobra 900 ka delegates sang Department of Education division of Bacolod para sa Negros Island Region Athletic Association Meet (Niraam) 2026.
Suno kay Secretary to the Mayor Atty Marty Go, ang send off ceremony patigayonon sa Bacolod City National High School alas- 2:00 sang hapon sa pagpanguna ni Mayor Greg Gasataya.
Suno diri, kadungan sa send off ceremony ipanagtag man sa mga athletes ang P10,500 nga allowance kada isa samtang padayon naman sa karun ang pagpanagtag sang training uniform, competition uniform kag uniform para sa parade sang mga athletes.
Samtang, ginalauman sang Department of Education – Negros Island Region nga mangin memorable ang pinaka-una nga NIRAAM 2026 nga patigayonon sa ciudad sang Bacolod.
Sa interview sang Bombo Radyo Bacolod kay DepEd-NIR Spokesperson Almyr Ceazar Dequiña, nagconduct sang meetings ang DepEd-NIR para sa preparasyon sa pahampang agud nga mangin impactful kag memorable ini.
Suno diri, ihatag nila ang ila best para mapilian ang best athletes nga magapresenta sa rehiyon sa national stage.
Nabisitahan naman nila tanan nga billeting areas kag sa karun may yara sila sang pagbag-o sa venues sang mga games kun sa diin ang iban nga outdoor games ang mahimo nga masaylo na indoor.
Samtang, may gamiton naman nga QR code ang mga athletes para ma-log ang ila paggwa kag sulod sa mga billeting area para sa ila safety.
Pahayag ni Dequiña nagtap naman sila sa Bacolod City Police Office kag Negros Occidental Police Provincial Office para sa safety kag security sang mga athletes, stakeholders kag mga bisita para sa NIRAAM 2026.
