Ginhatagan sang dako nga prayoridad ang safety sang mga atleta sa nagapadayon nga Negros Island Region Athletic Association (NIRAA) Meet 2026.
Sa interview sang Bombo Radyo Bacolod kay Almyr Dequiña, spokesperson sang Department of Education-Negros Island Region, kahapon, pila ka mga outdoors nga hampang ang temporaryo nga gin-untat bangud sa mataas nga forecasted heat index.
Ang mga hampang ang kinahanglan man nga pagauntaton ingkaso nga ang tyempo ang nagahatag sang risgo sa mga atleta.
Antes pa man mag-umpisa ang hampang may yara sang ginahatag sa mga atleta nga balasahon agud nga mahibaluan sang mga ini ang ila nga himuon sa tion nga may linog, sunog kag iban pa nga kalamidad.
May ginapatuman man nga hydrating time sa tagsa ka mga atleta.
Suno kay Dequiña, may ginhimo man nga adjustments sa hampang nga temporaryo nga ginpauntat bangud sa mataas nga heat index nakadepende sa scheme nga ginpreparar sang mga tournament directors.
Ginliwat man sini nga ang dapat mahatagan sang prayoridad ang safety sang mga atleta.
