Pormal na nga gin-appoint ni Presidente Ferdinand Marcos Jr. si anay Tourism Sec. Christina Garcia Frasco bilang Presidential Adviser for Sustainable and Resilient Communities, matapos ang pila ka semana nga espekulasyon natuhoy sa iya nga pagbiya bilang tiglikom sang Department of Tourism.
Suno sa Malacanyang, gintugyanan sang presidente si Frasco nga pangunahan ang pagpabaskog sang implementasyon kag pagpatuman sang mga prayoridad nga programa sa lebel sang komunidad, partikular sa mga lugar nga masami maigo sang kalamidad kag climate-related risks.
Kadungan sang iya bag-o nga papel, magaserbe bilang officer-in-charge sang Department of Tourism si DOT Undersecretary Verna Buensuceso agud mapasiguro ang padayon nga operasyon sang ahensya.
Ang appointment ni Frasco ang natabo sa tunga sang kritisismo nga iya nabaton angot sa ginaalegar “self-promotion” sa mga materyales sa turismo sang gobyerno, butang nga hugot niya nga ginpanginwala.
