Kapin 200 nga kapulisan kag militar ang gin-augment para sa dugang nga seguridad sa Sinigayan Festival nga nag-umpisa sang Marso 16 kag magatakop sa Marso 20.
Sa interview sang Bombo Radyo Bacolod kay Police Lt Col Alvimar Flores, nagpatigayon ang mga ini sang emergency meeting para sa pagplastar sang security plan upod sa mga ahensya nga involved, para maseguro ang malinong kag masadya nga selebrasyon.
Ang mga kapulisan nga gin-augment ang ginpadala sang Police Regional Office – Negros Island Region, samtang ang 79th Infantry Battalion sang Philippine Army ang magapatigayon man sang security patrol.
May-ara man sang dugang nga patrol cars nga gin-augment.
Luwas sa mga ini, may-ara pa sang bulig gikan sa mga forced multipliers.
Suno kay Flores, sila ang nagplastar sang 12 ka watch towers sa mga strategic areas nga masami ginadugukan sang tawo kaangay sa public plaza.
Ini agud mas malapad ang masakop sang monitoring, kag may mas mahapos nga mapangayuan sang bulig ang mga festival goers kun may-ara sang mga insidente.
Panawagan ni Flores sa mga festival goers nga halungan ang mga wallet kag cellphones, partikular na kun ara sa mga lugar nga madamo sang tawo, bangod ang sitwasyon ang mahimo gamiton sang iban agud makapangawat.
