Ginpasakaan sang criminal case sang Bureau of Internal Revenue (BIR) sa Department of Justice si Erminio “Harry” Roque Jr., Mylah Reyes Roque, kag Percival Sazon Ortega kahapon, natuhoy sa tax evasion nga may kaangtanan sa Biancham Holdings and Trading, Inc.
Santo sa imbestigasyon sang BIR, napaslawaan ang mga nasambit nga persona nga magsumiter sang ginakinahanglan nga tax returns kag magbayad sang nagakaigo nga buwis sa pagbalhin sang shares of stock kag sa pagsaka sang authorized capital stock.
Ginabanta nagdangat sa masobra P3.35 million ang kabug-usan nga tax deficiency, lakip na ang surcharges kag interes.
Santo sa Section 254 sang Tax Code, ang tax evasion ang may penalidad nga P500,000 tubtob P10 million kag pagkapriso sang anum tubtob napulo ka tuig.
Samtang, ang mga paglapas sa Section 255 ang may multa kag may penalidad nga pagkapriso sang tubtob napulo ka tuig magluwas sa pagbayad sang nagakaigo nga buwis.
