Patay ang 53-anyos nga lalaki matapos gintiro sang tatlo ka wala pa makilal-an nga mga suspetsado sa sulod sang iya puluy-an sa Brgy. Dolis, banwa sang Calatrava, kahapon, Mayo 5.
Ang biktima ang ginkilala nga si alyas “Junard”, 58-anyos, residente sang nasambit nga lugar.
Sa interview sang Bombo Radyo Bacolod kay Police Captain Jesus Alba, hepe sang Calatrava Municipal Police Station, ginpahayag nga upod sang biktima ang iya asawa kag bata sang matabo ang insidente.
Suno sa inisyal nga imbestigasyon, may tatlo ka armado lalaki nga nagpalapit sa ila balay kag wala na sang may natabo nga pag-istoryahanay kag ila gintiro ang biktima.
Duha ka igo ang naangkon sini sa ulo nga naglapos pa sa pihak, samtang may isa man ka igo sa tiyan.
Base sa testimonya sang asawa kag bata sang biktima, ang isa sa mga suspek ang nagasuksok sang helmet samtang ang duha ang wala.
Ginpahayag man nga makilala nila ang mga suspetsado kun makita liwat ang ila mga guya.
Ginalantaw nga posible nga motibo amo ang away sa duta.
Suno sa punong barangay sang Brgy. Dolis, may nauna na nga settlement sa tunga sang biktima kag himata sini, apang napaslawan nga makahimo sang kasugtanan.
Wala man sang iban nga record ang biktima sa barangay magluwas sa nasambit nga settlement.
Narekober naman sang mga kapulisan sa crime scene ang duha ka fired cartridges sang 9mm kag isa sang .45 caliber nga armas.
Gilayon naman nalagyo ang tatlo ka armado nga suspek padulong sa nabukid nga bahin sang lugar matapos ang krimen.
Padayon ang imbestigasyon sang mga otoridad samtang ginapanawagan sa publiko nga kun may yara sang impormasyon angut sa insidente, magpakig-angot lamang sa Calatrava Municipal Police Station.
