Ginluthang ang 52 anyos nga lalaki sang duha ka wala pa makilal-an nga persona sa hacienda Badiang, Brgy. E. Lopez, Silay City, Negros Occidental, alas- 6:00 kaina sang aga.
Ang biktima ang ginkilala nga si alyas Jess, 52 anyos, kasado kag residente sang nasambit nga lugar.
Sa interview sang Bombo Radyo kay PLt Col Edison Garcia, hepe sang Silay City Police Station, nagalakat si alyas Jess padulong sa iya trabaho sang gintawag ini sang duha ka lalaki nga nagatindog sa waiting shed.
Suno diri, hinali lang gintiro sang mga suspek si Jess nga nag-agom sang igo sa likod kag dughan.
Nagtinguha si Jess nga malagyo apang ginlaot pa ini sang mga suspek kag liwat nga gintiro sa tuhod.
Natigayon nga makapangayo sang bulig si Jess sa mga tawo sa palibot samtang nakapalagyo naman ang mga suspek.
Mahibaloan nga ang insidente nagluntad sa hacienda kun diin nagapuyo man ang Bornales siblings nga amo ang mga-utod nga ginlamposan sang bato kun sa diin napatay ang siyam ka tuig nga babayi samtang padayon nga ginabulong ang 15 anyos nga babayi kag ipadailom pa sa operasyon ang apat ka tuig nga lalaki.
Pahayag ni Garcia, wala sang kumpirmasyon nga may kaangtanan sa Bornales siblings case ang natabo kaina nga shooting incident.
