Patay ang isa ka army kag Cafgu Active Auxiliary (CAA) member matapos ginpangtiro sang wala matumod nga suspetsado sa Sitio Calubihan, Barangay Maquiling, Sagay City, alas 3:00 kahapon sang hapon.
Sa interview sang Bombo Radyo Bacolod kay Police Lt Col. Alvimar Flores, hepe sang Sagay City Police Station, ang mga biktima ang nagasakay sa motorsiklo kag nagikan sa detachment sang 79th Infantry Battalion sang Philippine Army sa Barangay Celestino Villacin, Cadiz City nga magapadulong kuntani Sagay City Proper agud mag-marketing para sa ila panyapon apang ang insidente ang nagluntad sa Barangay Maquiling, Sagay City.
Suno kay Flores, ang suspek ang nagasakay man sa motorsiklo samtang nagasuksok sang bonnet kag helmet nga halos nagasabay lamang sa mga biktima kag hinali nalang ang mga ini ginpangtiro.
May narecover naman ang mga kapulisan sang empty shells sang wala mahibaluan nga caliber sang armas luthang.
Sa karun wala matumod ang motibo kag kun sa diin ang mga samad sang duha nga gintunaan sang ila kamatayon.
Apang santo sa insyal nga imbestigasyon ginalantaw nga old grudge ukon daan nga higut-anon nga motibo sa krimen.
Nagapadayon naman ang imbestigasyon sang Sagay City Police Station agud nga matumod ang motibo kag may kahimuan sa krimen.
Samtang una naman nga ginkumpirmar ni 1st Lt Fevie Fajardo, Civil Military Officer sang 79th Infantry Battalion sang Philippine Army ang napatay nga ila miyembro.
Suno kay Fajardo, nag-marketing ang duha sang natabo ang shooting incident.
Ginatumod pa ang motibo sang krimen bangud wala man sang may nakuha nga kagamitan sa duha.
Sa karun padayon pa ang imbestigasyon sa insidente.
