Nakabaton na sang financial assistance ang mga fire victims sa Purok Magnolia, Brgy 7, Bacolod City.
Ang mga totally damage ang nakabaton sang tag P15,000; P10,000 kada isa sa mga partially damage kag P5000 sa tagsa ka mga sharers kag renters.
Ang mga fire victims ang ginabug-usan sang 32 ka totally damage, apat ka partially damaged kag 80 ka sharers.
Sa interview sang Bombo Radyo Bacolod kay Jean Carmela Dato-on-Rojo, isa sa mga nasunugan, nangin emosyonal ini kag tuman ang pagpasalamat sini bangud wala man sila ginpabay-an sang Local Government Unit sang Bacolod kag sang iya mga abyan, ila pamilya kag pamilya sang iya bana.
Suno kay Dato-on, wala ini makahibalo kung paano magbangon apang dako lamang ang pagpasalamat sini sa Ginoo nga wala sang may nasamaran ukon nadula nga kabuhi sa iya pamilya bangud sa nagluntad nga sunod.
Samtang, pagalimpyuhan pa ang lugar nga nasunog agud nga makapatindog liwat sang ila nga maestaran.
Nagapanawagan man ini sang bulig sa paghawan sa lugar.
Ginahulat man nila ang bulig nagikan sa opisina ni Bacolod City Lone District Congressman Albee Benitez.
Sa karun samtang amat amat nga nagabangon, panawagan sini nga mahatagan na sila sang right of away agud indi mabudlay ang magaresponde sa tion nga magluntad ang sunog.
