Ginklaro sang Philippine Army nga may nagakaigo nga proseso kag protocol nga ginasunod antes ma-release ukon ma-claim sang pamilya ang bangkay sang mga persona nga napatay sa engkwentro, ini natuhoy sa nagluntad nga engkwentro sa banwa sang Toboso, Negros Occidental sang Abril 19, 2026 sa diin 19 ka mga indibidwal ang ginbawian sang kabuhi.
Sa interview sang Bombo Radyo Bacolod kay Lieutenant Colonel Eric Alfonso, Commander sang 79th Infantry Battalion, may yara sang resistance sa bahin sang mga rebelde gani indi basta-basta nga makapalapit ang mga suldado.
Dugang pa, malawig ang natabo nga engkwentro nga naglawig humalin sang aga tubtob sa hapon.
Ginpanindugan sini nga ginpaidalom sa nagakaigo nga proseso ang pagkuha kag pag-turn over sang mga bangkay antes ini gin-release sa mga pamilya kag wala sang bayolasyon ang bahin sang Philippine Army.
Sa pihak sini, ginpahayag ni Alfonso nga hulaton na lamang ang resulta sang imbestigasyon agud mahibaluan ang matuod nga natabo kag mahatagan sang maathag nga sabat ang mga apektado nga pamilya.
