Padayon ang clearing operation sang 79th Infantry Battalion sang Philippine Army sa Barangay Tamlang, Escalante City, Negros Occidental kasunod sa nagluntad nga engkwentro batok sa remnants sang Northern Negros Front sang New People’s Army kahapon.
Napatay si Private First-Class Jhon Rey T. Brasil nga katapo sang 79th IB samtang naaresto naman ang ginakabig nga NPA nga si Junril Bacalso matapos makuhaan sang calibre 45 pistol sa joint checkpoint operation sang Armed Forces of the Philippines kag Philippine National Police sa Brgy Mabini, Escalante City.
Ginabanta lima ka NPA ang na-engkwentro sang militar samtang gin-evacuate ang masobra 200 ka indibidwal agud mapalayo sa area.
Sa karun nadala na sa FDN memorial chapel sa ciudad sang Sagay ang bangkay ni Brasil kag napahibalo ang pamilya sini.
Madumduman nga nagpahayag si Lieutenant Colonel Eric Alfonso, Commander sang 79th IB nga may patyon kun tani ang mga NPA apang antes pa natabo ang engkwentro, may mga napatay na ang mga NPA sang tinalikdan nga bulan sa banwa sang Calatrava.
