Wala sang narecord nga lugar sa ciudad sang Bacolod nga nakaeksperyensya sang pagbaha apisar sa pagbunok sang ulan halin kagab-i tubtob kaina sang kaagahon.
Sa interview sang Bombo Radyo Bacolod kay Dr Anna Maria Laarni Pornan, head sang Bacolod City Disaster Risk Reduction and Management Office, padayun ang ila nga monitoring sa water level sang mga suba kag sapa sa ciudad partikular na sa mga area nga masami ginabaha.
Ginapakamaayo ni Pornan nga apisar sa makusog nga ulan, wala sang namonitor nga pagsaka sang water level, lakip na sa Prk Carvic, Brgy Mandalagan, SM City Bacolod, sa bahin sang Brgy Sum-ag, kag iban pa.
Apang hugot nila nga ginpabantayan ang hotline inkaso may magapanawag para magpangayo sang rescue.
Suno diri, apisar nga yara sa Luzon ang Bagyo FRANCISCO, ginapabaskog sini ang Southwest Monsoon ukon Hangin Habagat nga nagadala sang maulanon nga panahon sa ciudad.
Ini ang kaangay man sa natabo nakaligad nga tuig, nga nagtrigger gid sang lapnagon nga mga pagbaha.
Gani sila ang wala man nagakampanti kag padayun nga magamonitor ilabi nga ginalauman nga magalawig pa tubtob sa Biyernes ang kaangay nga tiyempo.
Panugyan man nila sa mga nagapuyo sa low lying areas nga kun makita nga nagasaka ang water level, mag-evacuate na gilayon kag magkadto sa barangay, bangod nakahibalo na ang mga opisyales kun sa diin igahamtang ang mga evacuees.
