Arestado ang apat ka mga suspetsado matapos ma-recover ang kapin P2.6 million nga balor sang smuggled nga sigarilyo sa ginpatigayon nga hot pursuit operation sa banwa sang Vallehermoso, Negros Oriental kahapon, Hulyo 4.
Sa interview sang Bombo Radyo kay Police Captain Stephen Polinar, spokesperson sang Negros Oriental Police Provincial Office (NOrPPO), pasado alas-3:00 kahapon sang kaagahon, nagpatigayon sang hot pursuit operation ang Guihulngan City Police Station (GCPS) kaupod ang Regional Special Operations Group (RSOG) batok sa duha ka Toyota Revo nga nagpalagyo nga ginapahayag may karga sang smuggled nga sigarilyo.
Samtang nagpatigayon sang checkpoint ang mga kapulisan, natukiban nga ang duha ka salakyan ang separado nga na-aksidente sa Barangay Puan kag Molobolo sa nasambit nga banwa kag gilayon nga nagpadulong ang mga otoridad sa lugar.
Sa Baranagay Puan, nadulaan sang kontrol ang nagaduag itom nga Toyota Revo kag nabunggo rason nga naglapta ang pila ka mga master case kag ream sang smuggled cigarettes sa dalan.
Naluwas ang driver nga si alyas “Hamza,” 32-anyos nga residente sang Malabang, Lanao del Sur kag gindala sa Vallehermoso Rural Health Unit para sa nagakaigo nga pagbulong.
Samtang, gin-aresto naman ang iya upod nga si alyas “Ting,” 31-anyos kag residente sang Escalante City, Negros Occidental.
Sa Barangay Molobolo naman, nabunggo sa kilid sang dalan ang nagaduag maroon nga Toyota Revo.
Napilasan ang driver nga si alyas “Jamil,” 43-anyos, kag ang pasahero nga si alyas “Jamal,” 46-anyos, lunsay mga residente sang Manticao, Misamis Oriental.
Gin-aresto ang duha matapos sila ginhatagan sang nagakaigo nga pagbulong.
Na-recover sa duha ka salakyan ang 29 nga kahon nga naga-unod sang 1,184 reams sang ginapatihan smuggled cigarettes nga ginabanta nagabalor sang P2,639,000.
