Ginapanawagan sang Presidente sang United Sugar Producers Federation of the Philippines (UNIFED) ang aerial spraying sang systemic chemicals nga makapatay sang red-striped soft scale insect (RSSI) bilang immediate solution sa nagalala nga kahalitan.
Sa interview sang Bombo Radyo Bacolod kay UNIFED President Manuel Lamata, pabor sila sa Green Solution ukon ang plano sang Negros Occidental Provincial Government nga pagcultivate sang fungi kag pagpadamo sang labog-labog nga makabato sa RSSI, apang ini ang makonsiderar nga long term solution.
Panindugan ni Lamata nga duha tubtob lima ka tuig pa antes makapatubo sang fungi kag makapabuhi sang mga labog-labog nga sarang makacater sa 250,000 hectares nga sugar plantation.
Pahanumdom sini nga magabukas na ang milling season sa masunod nga tatlo ka bulan, kag kun magpadayon pagid ang pagpanghalit sang RSSI, 40 percent tubtob 50 percent sang sugar production ang madula.
Suno kay Lamata, nagpatigayon na sila sang conference upod sa mga tag-iya sang eroplano, developer sang systemic chemical pesticide, kag maayo man ang ginplastar nga programa, apang nakibot sila nga sa ulihi nagpagwa sang desisyon si Negros Occidental Governor Eugenio Jose “Bong” Lacson nga nagapamatok sa aerial spraying sa kahangawa nga ma-igo ang mga punong.
Suno kay Lamata, kalabanan nga mga katubuhan ang yara sa upland areas, nga wala man sang punong, kag sarang man nga makonsiderar nga ang mga sugot lamang nga sugar planters ang targeton sang spraying.
Dugang pa sini nga mangin prayoridad ang small planters bangod sila ang wala sang ikasarang nga magbakal sang kemikal, nga rasun kun ngaa wala nagakadula ang RSSI.
Suno kay Lamata, ang systemic chemical ang napamatud-an na nga wala sang malain nga epekto sa tawo kag iban nga kasapatan bangod ini ang madugay na nga ginagamit sa banana plantation sa Mindanao.
Dugang pa sini nga ang kemikal ang masalupsop sa dahon ukon lawas sang tanom sa sulod sang walo tubtob napulo ka adlaw, gani sa pagsuyop sang RSSI, hilo na ang ila nga mahigop.
Ang eroplano ang makaspray naman sa 600 hectares sa sulod sang anom ka oras.
Hangkat sini kay Lacson kag kay former Governor Lito Cosculluela nga gintawag niya nga nagapakuno-kuno nga environmentalist, nga siya ang handa nga magpusta sang P1 million nga indi pa makahatag sang solusyon ang Green Solution sang probinsya tubtob sa milling season.
Sa desisyon sang gobernador, nagalaom ini nga si Lacson ang magabayad sa ila mga kapierdihan.
