Liwat nga nagpahanumdom ang Regional Explosive Ordnance Disposal and Canine Unit sa Negros Island Region sa mga estudyante nga mangin kalmado kag indi magpanic kun may-ara sang mga bomb threat sa eskwelahan.
Sa interview sang Bombo Radyo Bacolod kay Police Captain Jester Minguez, Assistant Chief sang Regional EOD and Canine Unit – Negros Island Region, may-ara sang mga contingency plan ang mga eskwelahan nga ginapractice sa mga earthquake drill ukon fire drill, kag amo na lamang ang dapat nga ipatuman.
Suno diri kun magpanic ang mga kabataan, mahimo nga sila ang magdinaguso sa mga hallway kag mga entrance nga mahimo magresulta sa stampede.
Ang pagginutok ang makatuga sang mga aksidente kaangay sang mga magkaladasma, malapakan, masuffocate, kag iban pa.
Dapat man pangunahan sang mga school personnel ang paghatag sang instructions sa mga kabataan kun ano ang dapat himuon.
Pasalig ni Minguez nga kun makabatun sang report, sila ang gilayon nga magaresponder kag iclear ang area, tubtob nga madeklarar nga safe na ang lugar para makabalik ang klase.
Panugyan lamang sini sa mga kabataan nga kun may bomb scare, dal-on na lamang sa pag-evacuate ang mga bags kag iban pa nga pagkabutang.
Pinaagi sini mapanubo ang mga makonsiderar nga suspected packages ukon suspected baggage nga kinahanglan nila tsekyaron.
Suno diri, sila ang nagapatigayon man sang mga lectures sa eskwelahan agud itudlo ang mga dapat himuon kag kun ano ang indi dapat tandugon kun may-ara sang bomb threat.
