Ginhatagan na sang special permit ang 12 ka mga madugay na nga ambulant vendors sa bahin sang La Salle Avenue.
Sa interview sang Bombo Radyo Bacolod kay Bacolod City Administrator Atty Mark Steven Mayo, ginaregulate nila ang mga ambulant vendors sa idalom sang Ambulant Vending Ordinance.
Suno diri, sa malawig nga tinuig nga pagbaligya sang mga food vendors sa lugar, karun lamang ang mga ini nakabatun sang special permit.
Ang special permit ang nagahatag naman sa ila sang kaseguruhan sa pwesto, bangod makabig nagid nga legal ang ila pagbaligya.
Ang area ang gikan sa Garido Street padulong sa taytay.
Samtang sila ang pwede lamang makabaligya sa area halin alas-4:00 sang hapon tubtob alas-7:00 sang gab-i.
Pahanumdom naman ni Mayo nga dapat mobile ukon mahapos lamang mahimos ang baligyaan, kag indi pwede ang permanent structure.
Ini ang madugay naman nga practice sang mga ambulant vendors sa nasambit nga lugar.
Ginklaro naman ni Mayo nga gina-assess nila ang numero sang mahatagan sang special permit depende sa kalaparon sang area.
