Mahimo na nga makuha ang fuel subsidy sang kapin 30 ka Taxi driver sa Talisay City sa Land Transportation Franchising and Regulatory Board Region 6.
Madumduman nga nagdangop sa Ipa-Bombo Ta segment sang Bombo Radyo Bacolod ang mga taxi drivers sa idalom sang Christine Taxi agud magreklamo bangod wala pagid makabatun humalin sang gin-implementar ang pagpanghatag sang fuel subsidy sang LTFRB.
Bangod wala pa sang budget kag wala pa sang personnel sa idalom ni LTFRB-Negros Island Region Director Atty Gerry Llena, gani gintugyan sini sa mga may reklamo nga magdangop na lamang sa Bombo Radyo Bacolod agud matipon ang listahan kag iya matsekyar ang status sang ayuda.
Nasumiter kahapon sang aga sang Bombo Radyo ang mga ginsumiter nga dokumento sang kapin 30 ka Taxi drivers, samtang pagkagab-i gilayon man nga ginkumpirmar ni Llena nga sarang na nga makuha ang ayuda.
Suno diri, sa iya imbestigasyon nakita sini nga may gamay nga miscommunication sa listing sang operator sa mga driver.
Panugyan ni Llena nga kuhaon na lamang sang operator sa LTFRB Region 6 office sa Iloilo ang ayuda, apang ini ang mahimo man magpadala sang representative nga padal-an na lamang sini sang authorization letter nga may Special Power of Attorney (SPA).
Suno diri, magcontact na lamang sa iya kun yara na sa LTFRB Region 6 office agud macontact man sini nga yara na ang magakuha sang ayuda.
Samtang pasalig man sini nga imonitor nya first-hand kun mahatag gid man sang operator ang fuel subsidy sa mga taxi drivers.
Sa Martes na plano nga kuhaon sang operator sang Christine Taxi ang fuel subsidy gikan sa Transportation Franchising and Regulatory Board Region 6 para sa ila kapin 30 nga taxi drivers.
Ang mga drivers ang nagdangop sa Ipa-Bombo Ta segment kun sa diin ginkuha ang ila listahan kag amo ang ginpadala kay LTFRB-Negros Island Region Director Atty Gerry Llena kahapon sang aga.
Kagab-i, gilayon nga nag-update ang Regional Director nga nagapasalig nga sarang na nga makuha sang operator ang ayudad.
Sa interview sang Bombo Radyo Bacolod kay Andres Panibawan, isa sa mga taxi drivers, sa umpisa nagpahayag ang ila operator nga indi sini makuha ang ayuda sa Lunes.
Nahibaluan nga operator lamang ang makakuha sang ayuda, luwas nalang kun siya ang may hatagan sang authorization letter agud magserbe nga representante.
Subong palang nga Biyernes, sarang na nga makuha ang ayuda, apang agud indi na ma-alang alang sa oras, ginpanugyan nalang ni Llena nga ini ang kuhaon sa Lunes.
Apang sa umpisa, nagduha duha pa ang operator kag nagpahayag nga siya ang wala paman nacontact nga makakuha na sang ayuda.
Ginpinsar na ni Panibawan nga magpangayo nalang sang authorization letter nga siya na lamang ang magakuha para sa tanan nila nga units, apang ang authorization letter ang kinahanglan nga may Special Power of Attorney (SPA).
Sa ulihi, nagpahayag man ang operator nga siya na lamang ang magakuha sang ayuda sa Martes.
Una na nga ginpasalig ni Llena nga imonitor sini personal kun ginhatag sang operator ang ayuda nga para sa mga taxi drivers. Samtang, luwas sa nauna nga listahan sang mga taxi drivers sa Talisay City nga ginpadala Land Transportation Franchising and Regulatory Board Region 6 para sa releasing sang wala nabatun nga fuel assistance, may isa pa ka taxi driver nga nagdangop man sa Bombo Radyo Bacolod gikan naman sa lain nga operator.
Sa interview sang Bombo Radyo Bacolod kay LTFRB-Negros Island Region Director Atty Gerry Llena, ginapanugyan sini nga kun may ara pa ini sang kaupdanan mas maayo nga tingubon na lamang agud indi dugay-dugay balik sa LTFRB Region 6.
Ginpasalamatan man sini ang bulig sang Bombo Radyo Bacolod sa pagfacilitate sa pagtipon sang listahan.
Ginapakamaayo man niya nga sa estasyon nagpadulong ang mga drivers, gani madasig nga na-address ang issue.
