Patay ang isa ka pulis matapos nga malumos kasunod sang pagtuyo nga ma-rescue ang iya mga kaupod nga naanod matapos magtabok sa suba kag hana nga malumos sa Sitio Bisang, Barangay Luna, Cadiz City, Negros Occidental, Biyernes, Agosto 7, 2026.
Sa interview sang Bombo Radyo Bacolod kay Police Lt Daleen Grace Loreno, Deputy Chief of Police sang Cadiz City Police Station, ginkilala ang napatay nga si Police Master Sergeant Fernando Marfa, 40 anyos kag residente sang Cadiz City samtang ang mga upod sini nga gintuyo nga salbaron amo sanday Alnaven Rull kag Elmer Terencio Jr.
Suno kay Loreno si Marfa, ang nadestino sa Cadiz City Police Station kag una ini nga naassign sa traffic kag ginsaylo sa Bantay Dagat sang nakaligad nga tuig 2025.
Base sa imbestigasyon, sila ang nagapatigayon sang seaborne patrol kaupod ang mga miyembro sang Bantay Dagat sang Sitio Bisang, Barangay Luna, Cadiz City.
Samtang nagatabok sila sa suba bilang kabahin sang operasyon, duha sa iya mga upod ang gin-anod sang mabaskog nga daludo sang tubig kag dutayan nga malumos.
Sang natalupangdan ini ni Marfa, wala ini nagpang duha-duha kag naglumpat sa suba agud nga ma-rescue ang duha apang bangud sa mabaskog nga daludo sang tubig siya ang gin-anod kag nalumos.
Nagpatigayon sang search and retrieval operations ang mga personnel sang Cadiz City Police Station, sa pagpanguna sang ila hepe, kaupod ang mga responder sang City Disaster Risk Reduction and Management Office (CDRRMO).
Nakita kag narekober ang biktima kag gilayon nga gindala sa Cadiz District Hospital apang gindeklarar nga dead on arrival.
Ginkasubo man sang Police Regional Office Negros Island Region (PRO NIR) ang natabo kay Marfa.
Ginkilala ni PRO-NIR Director Police Brig Gen Romano Cardiño ang sakripisyo ni Marfa kag gindayaw ang ginhimo nga pagluwas sang kabuhi sang iban, kun sa diin bisan pa sa risgo sang iya kaugalingon nga kabuhi nagapakita ini sang pinakataas nga mga prinsipyo sang serbisyo publiko kag tradisyon sang Philippine National Police.
