Ginpakadtuan na sang Provincial Environment Management Office ang quarry operation sa Hacienda Pacita, Brgy Don Jorge Araneta, Bago City, nga ginareklamo sang mga pumuluyo.
Madumduman nga nagdangop sa Ipa-Bombo Ta segment sang Bombo Radyo Bacolod ang pila sa mga pumuluyo sang Hacienda Pacita bangod sa gina-alegar nagaka-ab ab na ang suba kag pila ka metros na sang propedad sang Agrarian Reform Beneficiaries ang nakaon.
Sa interview sang Bombo Radyo Bacolod kay PEMO Head Atty Julie Ann Bedrio, ginpakadtuan na nila ang quarry site, kag nag-upod man sa ila nga enforcement team ang pila sa mga ARBs.
Suno diri, ang permit ang para lamang sa commercial sand and gravel kag ang area of operation ang sa Maragandang river gid lamang.
Sa ila nga record, may napatigayon naman nga public consultation sa Brgy Don Jorge Araneta kag Brgy Ma-ao kag sila ang nakabatun man sang Barangay resolution, apang tsekyaron pa nila ang alegasyon sang mga pumuluyo sa Prk Riverside nga sa lain nga purok ginpatigayon ang public consultation apisar nga sila ang apektado.
May 13 ka Certificate of Land Ownership Award (CLOA) title malapit sa quarry site, apang wala man sang derekta nga apektado, luwas sa isa nga nakita nila naglaksam na ang propedad sa suba.
Pahanumdom ni Bedrio nga indi pwede nga mahatagan sang land title ang suba, bangod ini ang ginakonsiderar nga public property.
Samtang aminado man si Bedrio nga sang gintsekyar nila ang quarry operations, ini ang nagalapaw gid man sa area kun sa diin lamang ginapahanugutan.
Samtang isa man sa kahangaw sang mga ARBs ang ginplastar nga flaglet nga nagserbe marker kun sa diin lamang kutob ang quarry operation, nga ginpasaka sang operator sa gwa na sang ila operation area.
Ang mga flaglets ang ginkay-o naman sang enforcement team agud mabalik sa nagakaigo nga pwesto, apang sila ang nagschedule pa sang geodetic engineer nga amo gid ang magatakos sang sakop sang mga propedad kag operasyon.
Samtang ang issue sa propedad sang ARB nga naglapaw na sa suba, ang idangop man nila sa Department of Agrarian Reform.
Suno kay Bedrio, 8,000 cubic meters lamang ang ginapahanugutan nga makuha sa suba kada adlaw.
May ginasukot man nga extraction tax ang provincial government kag may permit to transport kun sa diin nakabutang ang volume sang mapagwa sang kada magahakot nga salakyan.
Pasalig ni Bedrio nga bukas lamang ang ila nga opisina sa pagbatun kun may-ara pa sang dugang ukon kaangay nga complaints.
