Status quo ukon indi anay pagtandugon ang nagabukid nga basura sa ginadevelop nga old landfill sa Mandalagan, Bacolod City samtang wala pa ang disposal plan sang Environmental Management Bureau-Negros Island Region.
Sa interview kay Bacolod City Mayor Greg Gasataya, sang Huwebes, nagmeeting ang ciudad sa contractor sa development sang isa ka simbahan samtang sang Miyerkules ang EMB ang nagmeeting man sa isa ka developer man sa lugar.
Madumduman nga tatlo ka pribado nga mga kompaniya ang nagapatigayon sang development sa nasambit nga lugar.
Suno kay Gasataya, nakasugtan nga ang EMB ang magadihon sang disposal plan sa mga basura nga yara sa bahin sang Barangay Mandalagan.
Suno diri, sa meeting nila sa directors sang Ikthus nadesisyunan nga wala lang anay sang aktibidad ukon indi lang anay pagtandugon ang basura samtang ini wala pa ang disposal plan sang EMB.
Suno sa alkalde ini ang ila ginahulat kag nagalaom ang ciudad nga madihon na ini sa labing madali nga panahon bangud ang ciudad ang willing mag-assists.
Dugang pa sang alkalde nga sang nagligad pa nga tuig ang request sa disposal sang basura gikan sa nasambit nga lugar apang natabuan nga wala ang ciudad sang mabutangan.
