Na-claim na sang pamilya ang bangkay sang isa sa duha ka mga kawatan nga tuyo nga magsulod sa isa ka balay sa subdivision sa Talisay City sang Martes, Agosto 25.
Ginkilala ini nga si alyas ‘Enjong’, 23-anyos nga residente sang Purok 6, Brgy Manta-angan, EB Magalona.
Madumduman nga naaktuhan sang security guards sang Plantazion Ayala sa Brgy Zone 15, Talisay City ang duha ka persona nga tuyo sudlon ang isa ka balay.
Gilayon nila ini nga gindakop, apang isa sa mga kawatan ang nakapalagyo.
Samtang si alays Enjong naman ang ginposasan kag ginpahapa.
Sa pagtsekyar sang Talisay City Disaster Risk Reduction and Management Office, wala na ini nagaginhawa.
Sa interview sang Bombo Radyo kay John Patrick Linda, Deputy Chief of Police for Administration sang Talisay City Police Station, ginpahayag sini nga ang iloy sang suspect ang nagpadulong sa ila estasyon kag ginkumpirmar nga iya bata ang bangkay.
Suno diri, nakita sa iloy sa social media ang pictures sang mga tattoo sa lawas sang iya bata gani ini ang iya nakilal-an.
Suno diri, indi matumod ang rason sa kamatayon ni alyas ‘Enjong’ bangud nagdesisyon ang pamilya nga indi na ipadailom sa autopsy ang bangkay kag sila na lang ang magpalubong.
Pahayag ni Linda, ang suspect ang may record sadto sa EB Magalona Municipal Police Station sa kaso may kaangtanan sa ilegal nga druga.
Sa pihak sini, suno kay Linda, magakoordinar sa gihapon ang Talisay City Police Station sa pamilya sang suspect.
Dugang pa sini, nakakuha naman sila sang mga impormasyon sa security guard nga nakaakto sa tuyo nga pagpangawat sang duha ka suspect.
Pahayag ni Linda nga padayon ang ila imbestigasyon sa pagdakop sa isa pa ka kawatan nga nakapalagyo.
