Patay ang isa ka persona samtang pilason naman ang isa ka manunudlo matapos magdangat sa pagpaniro ang kinagamo sa isa ka bag-o bukas nga resto bar sa Brgy Poblacion 1, Sagay City kaina sang kaagahon.
Sa interview sang Bombo Radyo Bacolod kay Police Lt Col Alvimar Flores, hepe sang Sagay City Police Station, madamo sang nagkadto sa opening sang nasambit nga resto bar, apang sang kaagahon, may nagluntad nga pagbina-isay sa tunga sang duha ka grupo.
Ginalantaw sini nga bangod sa kahulugbon, naglab-utanay ang duha ka grupo tubtob nga nagpaniro na ang 48 anyos nga suspect nga isa ka driver.
Ginbawian sang kabuhi ang isa sa mga biktima nga naga-edad 35 anyos, nga sa inisyal nila nga nakita nga may igo sang bala sa liog kag dughan, apang subject pa sa kumpirmasyon sang Scene of the Crime Operation.
Samtang pilason man ang isa ka public school teacher nga gindala sa ospital sa ciudad sang Bacolod para sa operasyon.
Gilayon man nga naaresto sang Sagay City Police Station ang suspect.
Suno kay Flores, kumpleto man sa papelis ang armas sang suspect.
