Nag-file sang petisyon sa Korte Suprema si Vice President Sara Duterte agud kontrahon ang tatlo ka counts sang kaso nga grave threat nga gin-file sang Department of Justice (DOJ) batok sa iya.
Sa Petition for Certiorari and Prohibition nga may kalakip nga aplikasyon para sa Temporary Restraining Order (TRO), ginpangabay sang bise presidente nga ipa-dismiss ang resolusyon sang DOJ nga nagarekomenda nga pasakaan siya sang nasambit nga kaso kasubong man ang resolusyon sang Quezon City Regional Trial Court na nagbasura sang iya nga motion to quash kag ang gin-isyu nga warrant of arrest batok sa iya.
Kalakip man sa hingyo sang bise presidente sa Supreme Court ang pagbalabag sa prosekusyon kag Quezon City RTC sa paghimo sang tikang angot sa kaso.
Ginpahayag sa petisyon ang pagkwestyon tuhoy sa limitasyon sang DOJ kag Quezon City RTC nga kasuhan siya bilang incumbent impeachable officer.
Ginsundan man gilayon sang kampo ni Duterte ang petisyon sang isa ka mosyon para sa madasig nga pagresolba sang TRO agud indi ini mangin moot and academic antes ang natalana nga arraignment kag pre-trial sini nga Setyembre 11.
