Pasar na sa 1st reading sang Bacolod City Council ang proposed P5.3 billion nga annual budget sang ciudad sa 2027.
Ini ang mas mataas sang P650 million kun ipaanggid sa budget subong nga 2026 nga P4.7 billion.
Sa interview sang Bombo Radyo Bacolod kay Bacolod City Councilor Thadeus “Thaddy” Sayson, chairperson sa Committee on Appropriations and Finance sang Sangguniang Panlungsod, target nila nga suguran ang marathon deliberation sa una nga semana sang Nobyembre, matapos sang tigkalalag.
Ginabanta sini 15 ka adlaw ang mangin marathon hearing, samtang Disyembre 15 ang gintalana niya nga deadline para sa 2nd kag 3rd reading.
Yara gihapon sa social services sector ang pinakadako nga budget allocations.
Sa 2026, ini man ang may pinakadako nga budget nga nagdangat sa P2.29 billion ukon 48 percent sang total budget.
Sa karun wala pa matumod kun pila ang iga-alokar kag ini ang madesisyonan pa sa budget deliberation.
Apang ginpasalig ni Sayson nga pasakaan sang budget ang mga programa kaangay sang local Assistance to Individuals in Crisis Situations (AICS), Bacolod City Comprehensive Health Program (BacCHP), kag burial assistance.
Samtang paathag ni Sayson nga 6 percent to 8 percent lamang ang allocations para sa debt servicing, sa pihak nga 15 percent ang ginapahanugutan.
