Nagarisgo na lamang ang gata vendor sa Libertad Public Market apisar sa dako nga pagnubo sa presyo agud nga sila ang mabaklan subong nga tigkalalag.
Sa interview sang Bombo Radyo Bacolod kay Melinda Mahinay, gata vendor, sang nakaligad nga tigkalalag yara pa sa P70 ang pagbaligya nila sang gata sa pinakadako nga size sang lahing.
Apang sa karun, yara nalang sa P40 ang ila pamaligya.
Aminado si Mahinay nga dako man ang ginnubo sang mga manugbakal.
Suno diri, sadto Oktubre 30 pa lamang madamo na sang nagabakal sang gata para sa mga lutuon sa tigkalalag, apang sini nga tuig dyutay lang gid ang nagabakal.
Ginalantaw niya nga ini ang bunga na sang dako nga pagsaka sa presyo sang gatong, kasubong man sang iban pa nga mga balaklon, samtang wala naman nagasaka ang sweldo.
Suno diri, kalakip sa nagmahal amo ang presyo sang ginakuhaan nila sang lahing.
Pahayag ni Mahinay nga sadto ini ang ginabakal nila sa balor nga P12, kag mabaligya ang gata sa balor nga P60 tubtob P70.
Apang sa karun, P25 na ang presyo sang lahing, kag ang ila pamaligya ang yara lamang sa P40.
Suno diri, ginpanubo man niya ang ginabakal nga supply sa 1,500 ka lubi bangod sa pag-iwat sang bumalakal.
