Patay ang 67-anyos nga babayi matapos ginluthang sang wala pa makilal-an nga suspect sa Barangay Nataban Proper, San Carlos City, Negros Occidental, alas-7:20 sang Huwebes sang gab-i.
Ginkilala ang biktima nga si Ernestita Actoy, kasado, mangunguma kag residente sang nasambit nga lugar.
Sa insiyal nga impormasyon, kaupod sang biktima ang iya bata nga si Bemar Actoy nga nagaluto sa ila kusina.
Matapos magluto, naggwa si Bemar sa ila balay kag nabilin ang iya nga iloy sa kusina.
Makaligad ang pila ka minutos, nakabati ini sang paglupok sang armas-luthang sa bahin sang ila kusina.
Nabatian man sini ang pagsinggit sang iya iloy nga nagapangayo sang bulig.
Gilayon siya nga nagsulod sa ila kusina kag nasapwan na lamang ang iya iloy nga wala na sang kabuhi kag may igo sang bala sa ulo kag baba.
Padayon pa nga ginatumod sang mga otoridad ang suspect kag ang motibo sa krimen.
