Gin-umpisahan na kahapon sa Senado sang Paraguay ang impeachment trial batok kay President Santiago Peña, pila ka adlaw matapos mag-collapse ang operasyon sang Ueno Bank nga gina-alegar may kaangtanan sa iya.
Ginpatigayon ang hearing isa ka adlaw matapos nag-file sang resignation si Peña.
Apang, wala ginbaton sang Kongreso ang iya resignation agud mapatigayon ang impeachment proceedings.
Ginabanta tatlo ka milyon ang depositor nga naapektohan matapos ma-kontrol sang Central Bank ang Ueno Bank kag i-freeze ang mga account sini.
Si Penia ang nagapangatubang sang mga alegasyon sang conflict of interest bangud siya ang anay nagapanag-iya sang shares sa kompanya nga may kontrol sa nasambit nga bangko.
Ginpanginwala naman sang Paraguayan president ang mga akusasyon.
Samtang, linibo ka mga pumuluyo ang nagprotesta kag nagpanawagan nga pasabton ang presidente sa pagsara sang nasambit nga bangko.
Ginhingyo ni Peña ang 72 ka oras ukon tatlo ka adlaw nga extension agud makapreparar sang iya depensa.
Suno diri, wala lang nagdugay nga nabaton sini ang halos 300 ka page sang mga akusasyon batok sa iya, apang siya ang ginalauman nga makasabat sa sulod sang dose ka oras.
Ginpahayag sang presidente nga indi insakto ang proseso kag nagpasalig nga ipresenta ang iya nga bahin sa publiko sa bulig sang iya mga abogado, apang, gin-deny sang Senado ang iya nga request.
