Southern Police District, desidido nga pasakaan sang kaso ang masobra 200 nga gin-aresto bangod sa illegal nga pagprotesta kadungan sa 2026 ASEAN Summit
-- ADVERTISEMENT --

Desidido ang Southern Police District (SPD) nga pasakaan sang kaso ang masobra 200 ka mga indibidwal nga gin-aresto nila bangud sa pagpatigayon sang iligal nga kilos-protesta.

Sila ang gin-aresto sa Sucat People’s Park sa Muntinlupa City kahapon, sa pag-umpisa sang 49th ASEAN Summit.

Ginsakay ang mga gindakop sa tatlo ka truck sang Philippine National Police.

Kadam-an sa ila nga naaresto ang katapo sang Timog Katagalugan.

Nagresulta sa pag-arestuhanay matapos nagluntad ang komosyon sa tunga sang kapulisan kag mga raliyista.

-- ADVERTISEMENT --

Ginpahayag man sang mga otoridad nga wala nagakooperar ang nasambit nga grrupo.

Paathag sang PNP nga ila lamang ginatuman ang ila katungdanan.

Santo diri, una na nga nagpakig-angot ang mga otoridad sa grupo apang gin-alegar nagpamilit ang mga ini nga patigayunon ang hublag-protesta kag programa sa kalsada.

Pila man ka mga protesters ang gin-report nga gindala sa ospital matapos ang natabo nga komosyon.

Temporaryo nga napahamtang sa National Capital Region Police headquarters sa Camp Bagong Diwa sa ciudad sang Taguig ang mga naaresto.

Nahibaluan nga hugot nga ginakondena sang grupo ang implementasyon sang Pax Silica Initiative kasubong man ang Luzon Economic Corridor sa Pilipinas.

Kalakip man sa ginapamatukan sang grupo ang pagbisita ni US President Donald Trump sa pungsod para magtambong sa 49th ASEAN Summit.