Ginpahayag ni President Ferdinand “Bongbong” Marcos Jr nga natingala ini sa mga ginpatigayon nga mga kilos-protesta batok sa inisyatiba nga Pax Silica sang Estados Unidos.
Suno sa presidente, wala pa na-finalize ang anuman nga kasugtanan natuhoy sa nasambit nga inisyatiba kag wala pa sang pirmahanay nga natabo.
Sa isa ka press conference kahapon matapos ang 33rd APEC Economic Leaders Meeting sa Shenzen, China, ginpaathag ni Marcos nga wala sang data centers nga igatukod sa pungsod sa idalom sang Pax Silica Project.
Dugang pa sini, ang tuyo lamang sang proyekto nga mapalawig ang technological products kag pagpakigbahin sang Pilipinas sa ekonomiya sang naga-uswag nga artificial intelligence.
Ini man suno sa iya ang tsansa sang pungsod nga makigbahin sa pag-develop sang global nga industriya sang artificial intelligence (AI) sa baylo nga mangin konsumer lamang sang mga produkto sini.
Ginganyat man ni Marcos ang publiko nga batunon ang nasambit nga proyekto kag inisyatiba bangud dako ang mabulig sini sa ekonomiya sang Pilipinas, Southeast Asia, kag sa bug-os nga kalibutan.
Sang nakaligad lamang nga inadlaw kadungan sang 49th ASEAN Summit kag pagbisita ni US President Donald Trump sa pungsod, linibo ka mga raliyista sa nagkalain-lain nga lugar ang nagpatigayon sang hublag-protesta sa pagpamatok sa Pax Silica initiative sang Estados Unidos bangud sa posible nga halit sini sa palibot kag dunang manggad sang Pilipinas.












