Dead-on-arrival ang isa ka abogado sa Dumaguete hospital samtang pilason naman ang duha sini ka upod matapos gin-ambush sang riding-in-tandem suspects sa syudad sang Guihulngan, Negros Oriental.
Sa inisyal nga imbestigasyon nga nakuha sang Bombo Radyo Bacolod, alas-2:40 kahapon sang hapon sang natabo ang insidente sa Sitio Lo-ok, Barangay Poblacion sa amo nga syudad.
Ginkilala ang biktima kay Atty. Anthony Trinidad, 53 anyos, samtang pilason naman ang asawa sini nga si Novie Marie Trinidad, 53 anyos lunsay residente sang San Carlos City, Negros Occidental, kag ang ila driver nga si Guillermo Magdasal, 52 anyos kag residente naman sang Guihulngan.
Sakay sa SUV ang tatlo ka biktima sang hinali na lang sila gin-tupongan sang riding-in-tandem suspects sa driver’s seat kag gin-pangtiro tubtob nadulaan na sang kontrol ang driver kag nabunggoan ang isa ka trisikad driver kag sa baral.
Gilayon naman nga gindala sa ospital ang mga biktima apang wala na nasalbar pa ang abogado.
Nakuha naman sa crime scene ang 7 ka bala kag slug sang .45 caliber pistol.
Padayon naman sa karun ang imbestigasyon sang Guihulngan City Police Station sa natabo nga pagpang-ambush.
