Wala nagapati ang presidente sang Alliance of Concerned Consumers in Electricity and Social Services (ACCESS) sa ginhambal sang Department of Energy nga mahagan-hagan ang nagaluntad nga power interruptions sa pungsod.
Sa interview sang Bombo Radyo Bacolod kay Wennie Sancho, wala na siya nagapati bangud ang DOE kag ang National Grid Corporation of the Philippines ang nagatudluanay nalang kun sin-o ang may sala sang nagaluntad nga power interruptions.
Suno kay Sancho, ang DOE ang nagahambal nga mabakal sang reserve ancillary apang ang NGCP ang may yara man sang collective capacity sang kuryente nga ipanagtag sa mga consumers.
Nagapanindugan ang DOE nga kun may reserve ancillary may yara sang reserba ang NGCP nga kun magnubo ang supply sang kuryente may ihatag ini sa consumers kag indi na kinahanglan ang yellow kag red alert advisories bangud mas mataas ang demand kumparar sa supply.
Ginpahayag man sini nga ang makaluluoy sa karun nga sitwasyon ang mga pumuluyo kag distribution facilities bangud sa indi paginstindihanay sang mga ahensya sang gobyerno.
Dugang pa sini nga kuntani makahimo man sang solusyon gobyerno kaangay sang pagbakal sang battery para sa storage sang solar energy agud nga makabulig sa supply sang kuryente.
