Ginapangabay sang Alliance of Concerned Teachers partylist nga indi maghalin sa political accomodation ni President Ferdinand ‘Bongbong’ Marcos Jr. ang bag-o nga tiglikom sa Department of Education, sa baylo ini ang dapat may ihibalo gid sa sektor sa edukasyon.
Sa interview sang Bombo Radyo Bacolod kay House Minority Leader kag ACT Teachers Partylist Representative France Castro, wala na ini nakibot sa pagresign ni Vice President Sara Duterte bilang DepEd Secretary.
Suno diri, maathag na ini humalin sang ginpahayag nga tubtob sa 2022 lamang ang UNITEAM nila ni Marcos kasubong na ang mga statement sini nga batok sa administrasyon.
Nagapati si Castro nga ang tanan ang nagsugod sang gindula ang confidential fund ni Duterte nga ginkaakig sini, samtang indi naman ini makaagwanta sa pagtrabaho kaupod ang iban nga gabinete nga lunsay kaalyado ni Marcos.
Panindugan sini nga welcome gid sa education sector ang pagresign sang bise presidente bilang tiglikom bangod umpisa pa lamang ginapahayag na sang mga ini nga indi kwalipikado kag indi competent sa pwesto si Duterte.
Dugang pa sini nga gina-ako man sang bise presidente nga wala ini sang eksperyensya sa sektor kag wala man ini sang napatuman nga dako nga improvement sa DepEd.
Pahayag pa ni Castro nga wala man nila nabatyagan ang pagsuporta sa mga manunudlo, kag kun may-ara sang ginapakita ini ang indi sinsero.
Panugyan sini nga dapat ang Deped Secretary ang may madalom nga eksperyensya kag ihibalo sa kahimtangan sang mga manunudlo kag estudyante.
Gani indi dapat nga magagikan sa political accomodation ang magpungko sa pwesto, kundi ang mga may background gid sa sektor agud nakahibalo kun ano ang mga problema nga dapat masolusyunan.
Bangod sa pagligwat sang pamunuan, ginalantaw na ni Castro ang posibilidad nga mauntat man ang Matatag Curriculum nga yara pa lamang sa pilot stage.
Pahayag sini nga ang ACT Partylist ang padayun nga nagaduso sang makabuhi man nga sweldo para sa mga manunudlo.
