BACOLOD CITY — Pagausisaon sang Police Regional Office 18 ang report nga isa ka alkalde sa Negros Occidental amo ang operator sang jai alai sa ciudad sang Bacolod kag iban pa nga bahian sang probinsya.
Sa interview sang Bombo Radyo, ginkumpirmar ni PRO-18 Director Police Chief Supt. Edmund Gonzales nga nakabaton sila sang report nga ang pagpataya sang jai alai ang nagakatabo sa Bacolod apang ang income sang nasambit nga illegal numbers game ang gina-remit sa isa ka alkalde sa Sur nga bahin sang probinsiya.
Ginpasalig ni Gonzales nga ila imbestigahan kun ano kamatuod ang amo nga impormasyon.
Samtang, ginpahayag ni Gonzales nga nangin maayo ang accomplishments sang kapulisan sa isla sang Negros batok sa illegal numbers game.
Apang suno sa PRO-18 director, base sa ila pag-monitor, nagapadayon ang bookies kag jai alai sa pag-operate, rason magapadayon sila sa pagpatigayon sang anti-illegal gambling operations agud ma-promote ang pagsakdag sang publiko sa mga legal nga pataya.
