BACOLOD CITY — Sa munisipyo na nagatulog ang alkalde sang banwa sang Hinigaran bangud sa kahadlok nga i-raid ini sang kapulisan sa ila balay kag tamnan sang ebidensya.
Ini ang ginkumpirmar ni Mayor Jose Nadie Arceo sa exclusive interview sang Bombo Radyo kasunod sang iya reklamo sa hepe sang Hinigaran Municipal Police Station nga si Police Senior Inspector Lawrence Gerald Bathan nga para sa iya, wala nagataha sa iya puder bilang alkalde.
Nahibaluan nga nagtuhaw ang konflikto sa tunga ni Arceo kag Bathan matapos nga wala nagkonsulta ang hepe antes ginkakas sa listahan sang high value target kag order of battle ang ginapahayag drug lord nga si Jessie Ramos.
Ini ang rason kun ngaa luyag ni Arceo nga paislan si Bathan apang wala pa sang positibo nga sabat ang Negros Occidental Police Provincial Office.
Suno sa alkalde, may pamahog na sa iya nga iga-raid ang ila balay bangud sa armas nga iya ginahuptan nga ginapaanggid ni Arceo sa kaso sang mga Parojinog sa Ozamiz City.
May yara man ini sang threat nga pagadulaon siya agud nga maghipos.
Suno kay Arceo, delikado sa karun ang iya kabuhi matapos gin-expose nga drug lord si Ramos kag ginapagwa sang mga pulis nga siya pa ang protektor sang iligal nga druga.
Samtang, may communication na nga ipadala si Arceo sa pinakamataas nga pinuno sang Philippine National Police agud ipalab-ot ang reklamo sa hepe sang kapulisan sa amo nga banwa.
Sa interview sang Bombo Radyo, ginpahayag ni Arceo nga magapadala siya sang sulat kay PNP Chief Police Director General Ronald ‘Bato’ Dela Rosa.
Pila na ka adlaw ang nakaligad, nagpadala sang memorandum si Arceo sa Hinigaran MPS agud ipaathag ni Bathan kun ngaa ginkakas ang ginapasuni nga drug lord nga si Jessie Ramos sa listahan sang mga drug personalities.
Apang tubtub sa karun suno sa alkalde, wala pa gid sang sabat ang mga kapulisan.
Sa karun, naga-apela si Arceo sa mga pumuluyo sang Hinigaran nga buligan ini bangud kun indi, siya ang mapatay.
Aminado si Arceo nga nakulbaan naman gani ang iya asawa bangud sa munisipyo na ini nagatulog.
