Patay ang ginatudlo nga lider sang drug group matapos ginaalegar nagbato sa mga kapulisan nga nagpatigayon sang buybust operation sa Victorias City, Negros Occidental, kaina sang aga.
Pasado alas-8:00 sang aga sang nabaklan sang P27, 000 nga balor sang suspected shabu ang subject nga si Leoner Jalandoon, 44-anyos, sa balay nga ila ginaarkilahan sa Salvacion Subdivision, Barangay 6, Victorias City.
Si Jalandoon ang tumandok sang Sitio Sibucao, Barangay Banago, Bacolod City apang nagsaylo sa Victorias sang tinalikdan lang nga inadlaw.
Suno kay Negros Occidental Police Provincial Office director Police Colonel Romeo Baleros, nadaho na ni Jalandoon ang buybust money apang nagbato sa poseur buyer sang iya namutikan nga isa ini ka pulis.
Bangud sini, napilitan ang operatiba nga tiruhon si Jalandoon sa nagkalain-lain nga bahin sang lawas nga nagresulta sa iya kamatayon.
Suno kay Baleros, naghanda sila sang precautionary measure bangud armed and dangerous ang subject.
Sa imbentaryo sang mga pulis, nakuha sa sulod sang kwarto ni Jalandoon ang 102 tanan ka sachet sang suspected shabu, kalakip ang buybust item, nga ginabanta nagabalor sang P2.7 million.
Nakuha man ang isa ka .38 caliber revolver kag isa ka granada.
Samtang, gindakop man sang kapulisan ang live-in partner ni Jalandoon nga si Janine Cruz, 18-anyos kag residente sang Barangay 16, Bacolod City kag priso karon sa Victorias City Police Station.
