Patay ang 42-anyos nga lalaki matapos ginlabo sang iya kaugalingon nga amay sa Sitio Hakpan, Brgy, Maaslob, Calatrava, Negros Occidental sang Sabado sang aga.
Sa interview sang Bombo Radyo kay Police Major Lumyaen Lidawan, hepe sang Calatrava Municipal Police Station, ang biktima ang ginkilala kay Carlito Bini, 42-anyos samtang ang suspetsado amu ang amay sini nga si Rebico Bini, 65-anyos.
Suno kay Lidawan, may daan na nga hiligut-anon ang mag-amay bangud sa away sa duta.
Sang Sabado, nagapang-utod sang kahoy si Rebico sang may nagluntad nga pagkomprontahanay sa ila ni Carlito.
Nagkuha sang machete si Carlito kag ginlabo sang makapila ka beses ang amay sa nawala nga kamot kag guya gani gindepensahan ni Rebico ang iya kaugalingon kag ginlabo man sa tiil ang bata sini kag nagpalagyo.
Wala man kuntani sang intensyon ang amay suno kay Lidawan nga patyon ang biktima bangud depensahan lamang sini kuntani ang iya kaugalingon.
Suno sa iya, indi man patal ang pilas nga naagom ni Carlito apang bangud malayo ang ila ginaistaran sa ciudad, nadulaan ini sang kabuhi antes paman sila makalab-ot sa ospital bangud sa kadamuon sang dugo nga nadula sa iya.
Natigayon naman nga nadakpan si Rebico sa ginpatigayon nga hot pursuit operation kag sa karun yara na sa kustodiya sang Calatraval Municipal Police Station.
