Nagasakit ang buot sang isa ka Animal Advocate sa pagkapatay sang Asong Pinoy (ASPIN) nga ginkilala nga si Cindy Maria, matapos ini ang gina-alegar ginpadospose sang rector sa San Sebastian Cathedral.
Gina-ulan sa karun sang pagmulay ang statement nga ginpagwa ni Msgr. Ronaldo Quijano pinaagi sa Diocese of Bacolod nga nagapanindugan nga iya ang wala nagmando sa pagpapatay sang bisan ano nga layaw nga sapat nga yara sa vicinity sang cathedral.
Suno diri, nagkoordinar siya sa mga opisyales sang Barangay sa pagregulate sa mga sapat bangod sa risgo nga sila ang makahalit sa tawo kag nagahigko sa compound.
Dugang pa sini nga wala ginatolerar sang simbahan ang unjust cruelty sa bisan ano nga tinuga sang Ginoo.
Sang ginpadulungan sang Bombo News Team, wala na nagpa-interview si Msgr Quijano sa panindugan nga sila ang nakapagwa na sang statement.
Nahibaluan nga si Cindy Maria ang ginsulod sa sako, nakagapos ang apat ka mga tiil gamit ang alambre kasubong man ang mga bibig.
Ang ido ang nasapwan na lamang nga wala sang kabuhi ilabi na nga nabulad sa initan ang sako.
Ginapahayag nga ginsugo ni Msgr Quijano ang mga construction workers nga nagatrabaho sa simbahan nga idispose ang mga layaw nga sapat.
Sa interview sang Bombo Radyo Bacolod sa isa ka Animal Advocate, sang 2020 ini umpisa nga nagpakaon sang 80 tubtob 100 nga mga layaw nga ido bangod sila ang wala sang makaon bangod sarado ang mga restaurants sang pandemic.
Isa si Cindy Maria sa iya mga napakaon nga sunod sa animal advocate, tuman ka sweet nga sahi sang ido.
Nahibaluan sini ang insidente sang ginpost sang isa ka concerned citizen sa animal organization sa Bacolod.
Gintinguhaan pa nga masalbar ang ido, apang wala na ini sang kabuhi sang maabtan.
Pahayag sang animal advocate nga gin-ako mismo ni Msgr Quijano nga siya ang nagsugo sa pagdispose sa sapat.
Ginalantaw sini nga bangod sa term nga “dispose”, mahimo nga namisinterpret lamang sang mga construction worker nga ginapapatay sini ang sapat, bangod mahimo man nga ini ang nagakahulugan nga pangitaan lamang sang mahatagan.
Mahimo man nga ginlampusan ang ido bangod may nakita nga dugo sa iya nga baba.
Patay man ang mga totoy ni Cindy Maria nga ginpanulod man sa sako.
Paathag sini nga ang mga stray dogs ang masami wala nagapangagat bangod naanad sa tawo, samtang sila ang matinlo man kag indi sa bisan diin lamang nagahigko, indi kaangay sa mga ido nga nabukot sa balay.
Dugang pa sini nga luyag tani sini sadto kuhaon si Cindy Maria apang indi ini mag-upod bangod palangga sini ang simbahan.
Apang sa baylo sini, siya ang wala ginpalangga sang mga taga-simbahan.
Pahayag sini nga gincontact nila ang City Pound, apang ini ang nagpanginwala nga nakacontact sa ila ang pari, suli sa nauna nga pahayag ni Msgr Pasquin nga siya ang nakig-angot.
Wala man ini nagapati nga nagdangop sa Barangay ang pari, sa baylo ginalantaw sini nga derekta nga nagmando sa mga construction worker ang pari.
Pahanumdom sang animal advocate sa pari nga nakita sang Diyos kun ini ang nagasugid sang kamatuoran.
