BACOLOD CITY — 65 porciento na nga natapos ang flyover sa dalan Araneta-Magsaysay.
Ini ang ginpahayag ni Bacolod Lone District Congressman Greg Gasataya, base sa report sang Department of Public Works and Highways (DPWH) Bacolod Engineering District.
Suno kay Gasataya, nasunod sang contractor ang schedule sang construction kag ginpasiguro nga matapos ang flyover kag sarang na nga maagyan sang mga salakyan sa bulan sang Nobyembre.
Aminado ang mamalidha nga iya gin-ayu nga hingagawon ang proyekto sa Oktubre para sa Masskara Festival apang nagpabutyag ang contractor nga indi nila ini matigayon.
Nahibaluan nga sang nagligad nga duha ka semana, ginasira ang dalan Magsaysay humalin alas-9:00 sa gab-i tubtob alas-7:00 sa aga para sa pag-obra sang P400 milyones nga flyover apang sumugod kahapon, bukas na ini sa trapiko sa amo nga mga inoras.
Samtang, ginkumpirmar ni Gasataya nga yara na sa National Economic and Development Authority (NEDA) ang papeles para sa patukuron nga ikatatlo nga flyover sa ciudad sang Bacolod nga igapahamtang sa Burgos-Circumferential Road nga mahimo pagasuguran sa madason nga tuig.
CHO NEW BUILDING
Sa pihak nga bahin, nagalaum si Gasataya nga makapatigayon na sang bidding sa madason nga bulan para sa pagpatukod sang bag-o nga building sa compound sang City Health Office.
Suno kay Gasataya, may inisyal nga P20 milyones nga gintigana para sa amo nga edipisyo nga sarang magamit bilang talatapan, lying-in clinic ukon balataan kag iban pa.
Kun makapatigayon na sang bidding, mahimo masuguran na ang proyekto sa labing madali nga panahon.
Suno kay Gasataya, nagpasalig naman ang Department of Health (DOH) nga magahatag sang dugang nga pundo sa madason nga tinuig.
Nahibaluan nga nagakinahanglan sang P65 milyones agud mapatindog ang bag-o nga building sa CHO.
