Ginahulat pa sa karun kun ano ang mangin desisyon sa pagpamuno sa Nepal.
Sa interview sang Bombo Radyo Bacolod kay Bombo International News Correspondent Dr Hector Gayares, medical doctor kag missionary sa Nepal, nagpatawag kahapon sang dialogo ang Nepal Army Chief nga amo sa karun ang temporaryo nga nagtake-over sang gobyerno, sang dialogo upod sa mga representative sang protesters kag kay Nepali President Ramchandra Paudel.
Samtang wala naman nahibaluan kun sa diin sa karun si ex-Nepali Prime Minister KP Sharma Oli, nga nanaog sa pwesto bangod sa malala nga kinagamo.
Suno kay Gayares, panawagan sang mga nagaprotesta nga idissolve ang Parliament, kag kun ini ang madayun, wala na sang masunod nga Prime Minister.
Dugang pa sini nga bisan ang Presidente ang ginapasumiter man nila sang resignation.
Ginalantaw sang doktor ang posibilidad nga may-ara sang grupo sang mga indibidwal nga temporaryo nga magapungko bilang interim government.
Sa pihak sini, indi luyag sang mga nagaprotesta nga ang magdumala sa pungsod ang gikan sa bisan sin-o sa mga nakaligad nga lideres sang pungsod.
Nagalaom si Gayares nga magtahaw na ang sitwasyon, samtang ginapasalamat man sini nga malinong ang ila nga sitwasyon sa ospital bangod mataas ang pagtahod sang mga pumuluyo nga neutral ang posisyon sang ila nga field.
