Ginakahangawa-an ang posibilidad nga magtupa sa kalibutan sa December 22, 2032 ang isa ka asteroid nga may pwersa nga makadula sang isa ka ciudad.
Suno sa datos sang NASA, may 3.1-percent nga tyansa nga mag-igo sa Earth ang natumod nga asteroid sa amo nga tuig gani ini ang mangin pinaka-delikado nga bato gikan sa kahawaan nga na-record sang modern forecasting.
Gintawag ini nga 2024 YR4.
Sa pihak sini, ginpahayag naman sang mga eksperto nga indi kinahanglan nga maalarma bangud hugot man nga gina-monitor sang global astronomical community ang sitwasyon.
Una nga na-detect ang 2024 YR4 sang El Sauce Observatory sa Chile sang December 27 sang nagligad nga tuig.
Ginabanta sang mga astronomers ang size sini nga yara sa 130 kag 300 feet ukon 40–90 meters ang kalapadon base sa kasanagon sini.
Ang ulihi nga tion nga may pamahog sang dako nga risgo sang asteroid nga may masobra sa 30 meters ang size amo ang Apophis sang 2004 nga may 2.7 percent chance nga mag-igo sa Earth sa 2029 apang ginkakas na sang dugang nga mga obserbasyon ang ini nga posibilidad.
