Panawagan sang asawa sang overseas Filipino worker nga bangkay na sang makapauli nga mahatag ang autopsy result bangod sa kwestyonable nga natural death ang ginhatag nga rasun sang kamatayon sang biktima.
Ang biktima ang ginkalala nga si James Melvic Javelosa, tumandok sang banwa sang EB Magalona, Negros Occidental kag OFW sa Jeddah City, Saudi Arabia.
Sa interview sang Bombo Radyo Bacolod kay Quenie Javelosa, indi sila magpati nga cardiac arrest and deterioration of vital signs ang rasun sang kamatayon ni James.
Ini bangod makita man sa medical result nga ini ang puno sang lagob sa lawas.
Suno kay Quenie, imbes nga sa ila pamilya, ginapahayag nga sa agency ginhatag ang autopsy result ni James.
Apang sang ginpangita sa agency, ginpahayag naman sang mga ini nga na-upod sa box sa casket sang bangkay ang mga dokumento.
Upod sa personnel sang Overseas Workers Welfare Administration (OWWA), gintsekyar nila sang madala sa punerarya pag-abot sa Negros Occidental ang bangkay, apang wala sa dokumento ang autopsy result.
Panawagan sang pamilya nga mahatagan sang hustisya ang kamatayon ni James apang ginsarado gilayon ang imbestigasyon kag natural cause ang nakarecord nga ginkamatay sini.
Pahayag ni Queenie nga Mayo 14, gina-alegar nga gindala sa ospital si James matapos makita nga unconscious sa dalan.
Apang wala man natumod sang pamilya kun diin nga ospital gindala ang pasyente, apang gina-alegar nga ginbutang ini sa mechanical ventilation tubtob nga nacommatose kag ginsaylo sa Intensive Care Unit (ICU) tubtob nga napatay sang Mayo 17.
Sang ginpahibalo nila sa agency nga na-ospital ang iya bana, ginpakita sa ila ang video kun sa diin nakabrief lamang si James kag gina-alegar nga nakagamit sang illegal nga droga.
Apang ini ang kwestyonable man para sa iya bangod wala pa sang isa ka semana sang siya ang mag-abot sa Jeddah gani makatilingala kun sa diin ini makakuha sang nasambitan nga substance.
Wala naman ang mga ini sang plano nga ipaidalom sa re-autopsy ang bangkay bangod ini ang natandog na, sa baylo ginapanawagan nila nga mahatagan sang original copy sang autopsy report agud matumod gid kun ano ang ginkamatay sang iya bana.
