Masarangan mo ayhan nga mabuhi nga maggastos lamang P70 sa kada adlaw agud nga ikaw makabakal sang balay?
Sa Japan, may isa ka babaye nga P70 lang ang iya ginasto sa pagkaon adlaw-adlaw kag nakabakal sang balay.
Ini ang ginkilala kay Saki Tamogami, isa ka 37-anyos nga real-estate agent, kag kilala siya sa nasambit nga pungsod bilang pinakamakinot nga babayi bangud sa iya commitment sa paggasto sang tuman ka gamay sa pagkaon kag mangin sa iya kinahanglanon.
Nagaedad pa lamang ini sang 19 anyos sang nag-umpisa sa pagkinot sang kwarta.
Sa edad nga 27, nakasupot ini sang kwarta halin sa iya sweldo kag nagbakal sang balay sa Saitama, north sang Tokyo, sa balor nga 10 million yen ukon halos P4 million.
Makaligad ang pila ka tuig, nagbakal ini sang iya second house sa balor nga 18 million yen ukon masobra P7.1 million, kag makaligad pa gid ang lima ka tuig, nabakal niya ang ikatatlo nga balay sa balor nga 37 million yen ukon halos P14.6 million.
Apisar nga natuman na sini ang iya nga handum, padayon ini nga nagakabuhi nga makinot kag nagasupot sang kwarta agud nga magbulig sa mga gin-rescue nga kuring.
Nagbukas naman ini sang cat cafe sa ground floor sang isa sini ka balay kag plano nga mag-invest sa iban nga mga propedad sa palaabuton.
