Kumpyansa ang general manager sang Bacolod City Water District (BACIWA) nga masarangan nila nga mag-operate agud nga mahatagan sang water supply ang mga Bacolodnon pananglitan nga irevoke ang business permit sang PrimeWater.
Sa interview kay Engineer Michael Soliva, nagpadulong sila sa Sangguniang Panlungsod agud nga ijustify ang board resolution nga ginsumiter sang Board of Directors sang BACIWA sa City Council.
Suno kay Soliva ang purpose sang board resolution amo nga mabuligan sila sang ciudad bangud nahimo na nila ang tanan nga paagi agud maimprubar sang Primewater ang serbisyo, apang wala gihapon sang pagbag-o.
Suno diri may kabudlayan sa pagcommunicate sa pamunuan sang Primewater nga makapila na nila ginpangayuan sang mga kinahanglanon nga data, apang wala gid mahatagan.
Nagpasalig man si Soliva nga kun magrant ang ginpropose nga pagrevoke sang business permit sang PrimeWater, ang BACIWA ang may ikasarang sa pagpadayun sang operasyon sa paghatag sang tubig sa mga pumuluyo.
