Nagtipon ang mga katapo sang transport group nga Bacolod Alliance of Commuters Operators and Drivers Inc. (BACOD) sa old airport sa Barangay Singcang bilang pag-upod sa nationwide transport strike nga ginpanawagan sang MANIBELA.
Sa interview sang Bombo Radyo Bacolod kay BACOD President Rudy Catedral, nagbyahe lamang ang iban sa ila sang kaagahon apang nag-upod man sa transport strike nga nag-umpisa alas-8:00 sang aga.
Wala paman sang nadakpan sa mga ini kag sila ang wala naman sang plano nga magbyahe bangod sa tuman ka dako nga multa nga nagadangat sa P62,000 kag suspension sang driver’s license sa sulod sang isa ka tuig.
Madumduman nga natapos na ang ginhatag nga grace period sa pagbyahe sang mga unconsolidated tarditional jeepneys kahapon.
Suno kay Catedral, bisan wala pa sang guidelines ginpahayag na ni Land Transportation Franchising and Regulatory Board (LTFRB) Region 6 Officer in Charge Atty. Salvador Altura nga nakadepende sa Department of Transportation (DOTr) kun magapatigayon na sang pagpanakop.
Bangod sini, sila ang nag-upod lihok ni MANIBELA chairman Mar Valbuena agud mapakita sa gobyerno ang epekto sang palpak nga public utility vehicle (PUV) modernization program.
Makita suno diri sa madamo nga nagkalastranded nga pasahero gikan sa nagkalainlain nga bahin sang Bacolod City ang epekto sang ginatawag sini palpak nga programa.
Alas-4:00 subong nga hapon, sila ang nagsaylo naman sa Bacolod Fountain of Justice sa pagpatigayon sang programa.
